Kikosi chetu kimeendelea na mazoezi katika Uwanja wa Mo Simba Arena kwa ajili ya kujiandaa na mchezo wa Ligi Kuu ya NBC dhidi ya Pamba Jiji utakaopigwa Novemba 22.

Mazoezi hayo yameongozwa na Kocha Mkuu, Fadlu Davids pamoja na wasaidizi wake wote huku wachezaji waliopo kwenye majukumu ya timu za taifa wakipewa ruhusa kwenda kujiunga nazo.

Mapema hii leo kulitoka taarifa kutoka Bodi ya Ligi kuwa kuhusu mchezo wetu wa Pamba ambao ulikuwa haujapangiwa tarehe kuwa utapigwa katika dimba la CCM Kirumba jijini Mwanza, Novemba 22.

Wachezaji ambao wapo kwenye majukumu ya timu za taifa ni Aishi Manula, Shomari Kapombe, Mohamed Hussein ‘Zimbwe Jr’ na Kibu Denis ambao wapo kwenye kikosi cha Stars.

Nyota wetu wanne wa Kimataifa ambao wapo kwenye majukumu ya timu za taifa ni Moussa Camara (Guinea), Steven Mukwala (Uganda), Valentino Nouma (Burkina Faso) na Joshua Mutale (Zambia).