Simba Queens imeibuka na ushindi mnono wa mabao 6-2 dhidi ya Gets Program katika mchezo wa Ligi Kuu ya Wanawake Tanzania (TWPL) uliopigwa katika Uwanja wa KMC Complex.
Jentrix Shikangwa alitupatia bao la kwanza dakika ya tano baada ya kumalizia mpira wa krosi uliopigwa na Elizabeth Wambui.
Dakika mbili baadae Elizabeth Wambui alitupatia bao la pili baada ya kupokea pasi ndefu iliyopigwa na Vivian Corazone.
Jentrix alitupatia bao la tatu dakika ya 11 akiwa ndani ya 18 baada ya kumalizia mpira mwingine wa krosi uliopigwa na Wambui.
Janeth Nyagali aliipatia Gets Program bao la kwanza dakika ya 15 baada ya kuwazidi ujanja walinzi wa Queens kufuatia pasi ndefu kutoka nyuma iliyopigwa na Protasia Mbunda.
Nasma Khalid aliipatia Gets Program bao la pili dakika ya 39 baada ya mpira wa kona uliopigwa na nahodha Diana Mnali kugonga mwamba wa juu kabla ya kumkuta mfungaji.
Kipindi cha pili tulirudi kwa kasi ambapo dakika ya 49 Jentrix alitupatia bao na nne huku alikamilisha hat trick baada ya mlinzi Protasia Mbunda kufanya makosa.
Asha Rashid ‘Mwalala’ alitupatia bao la tano dakika ya 84 baada ya kumalizia mpira wa krosi uliopigwa na Wambui.
Wakati wengi wakidhani mchezo huo utamalizika kwa ushindi wa mabao matano Asha Djafari alikamilisha karamu ya mabao kwa kufunga bao la sita baada ya kumalizia mpira wa Wincate Kaari.
Kocha wa Simba Queens, Yussif Basigi alifanya mabadiliko ya kuwatoa Dotto Evarist, Ritticia Nabbosa na Precious Christopher na kuwaingiza Wincate Kaari, Asha Djafari na Asha Rashid.
Ushindi huo unaifanya Queens kufikisha alama 15 ikiwa kileleni mwa msimamo baada ya kushinda mechi zote tano.
