Kikosi chetu leo saa 10 jioni kitashuka katika Uwanja KMC Complex kuikabili KMC FC katika muendelezo wa Ligi Kuu ya NBC.
Tutaingia katika mchezo wa leo tukiwa na kumbukumbu nzuri ya ushindi wa bao moja tuliopata dhidi ya Mashujaa katika mechi iliyopita.
Tunategemea kupata upinzani mkubwa kutoka kwa KMC kutokana na ubora walionao unaotokana na kocha anayewanoa.
Kauli ya Kocha Fadlu….
Kocha Mkuu, Fadlu amesema KMC wana kikosi bora pamoja na kocha wao lakini tumejiandaa vizuri kuwakabili na kuondoka na pointi zote tatu.
Kocha Fadlu ameongeza kuwa kikosi kipo kwenye hali nzuri na kimepata siku nne za maandalizi kuelekea mchezo huo na matumaini ya kufanya vizuri ni makubwa.
“Itakuwa mechi ngumu na nzuri, aina soka wanalocheza KMC halitofautiani sana na sisi. Wana timu bora lakini sisi tupo vizuri pia na tumejipanga kuhakikisha tunapata alama zote tatu,” amesema Kocha Fadlu.
Awesu awaita mashabiki KMC Complex….
Akizungumza kwa niaba ya wachezaji kiungo mshambuliaji, Awesu Awesu amewaita mashabiki kujitokeza kwa wingi uwanjani ili kuwapa sapoti ambayo itasaidia kupatikana kwa pointi tatu.
“Mashabiki ni wachezaji wa 12 tunawahitaji sana kwenye mchezo wa leo nasi tumejipanga kuhakikisha tunawapa furaha,” amesema Awesu.
Hali ya kikosi…….
Akizungumzia hali ya kikosi kocha Fadlu amesema kiungo mshambuliaji Joshua Mutale alipata maumivu katika mchezo dhidi ya Mashujaa lakini itategemea na vipimo vya daktari kama atakuwa sehemu ya kikosi leo.
“Mutale alipata maumivu lakini anaendelea vizuri, Abdulrazack Hamza ameanza mazoezi ingawa hayupo tayari kwa mchezo wa leo, Yusuph Kagoma na Valentino Mashaka wao bado ni majeruhi,” amesema Kocha Fadlu.
