Kocha Msaidizi, Seleman Matola amesema mchezo wa kesho wa Ligi Kuu ya NBC dhidi ya Mashujaa utakaopigwa katika Uwanja wa Lake Tanganyika utakuwa mgumu lakini tumejiandaa kushinda.

Matola amesema mara zote mchezo dhidi ya Mashujaa haujawahi kuwa mwepesi kwetu na tunakumbukumbu ya kutolewa kwenye michuano ya CRDB Bank Federation Cup tulivyokutana mara ya mwisho msimu uliopita.

Matola ameongeza pamoja nakuwa na wachezaji wengi ambao hawakuwepo katika mchezo uliopita wote wanafahamu ugumu na umuhimu wa kupata pointi tatu.

“Ni mechi ngumu. Mashujaa ni timu bora hasa inapokuwa katika uwanja wa nyumbani lakini tumechukua tahadhari zote huku lengo likiwa kuondoka na pointi tatu,” amesema Matola.

Akizungumza kwa niaba ya wachezaji kiungo mkabaji, Mzamiru Yassin amesema licha ya kushindwa kupata ushindi kwenye mchezo uliopita lakini sisi bado ni bora zaidi yao.

Mzamiru amesema daraja ilipo Simba ni juu zaidi ya Mashujaa ingawa kwenye mpira ubora wa dakika 90 ndio unaamua mechi.

“Itakuwa mechi ngumu lakini Simba ni bora zaidi ya Mashujaa na sisi hatupiganii nafasi ya pili au ya tatu bali ubingwa kwahiyo kila mechi kwetu ni fainali,” amesema Mzamiru.