Kocha Mkuu Fadlu Davids amesema mchezo wa kesho dhidi ya Tanzania Prisons utakuwa mgumu kutokana na timu kukosa muda mzuri wa kufanya maandalizi.

Kocha Fadlu amesema timu yetu imetoka kucheza mechi kubwa na ngumu ya Dabi halafu hawajapata muda wa kurejesha utimamu wa mwili na kesho wanatakiwa kushuka dimbani.

Hata hivyo kocha Fadlu ameongeza kuwa amekiandaa kikosi kiakili kuhakikisha kinapata matokeo chanya.

“Utakuwa mchezo mgumu kutokana na kukosa kupata muda wa kufanya mazoezi sababu ya kucheza mechi ngumu ila tupo hapa kwa ajili ya kuhakikisha tunapata ushindi,” amesema Kocha Fadlu.

Akizungumza kwa niaba ya wachezaji nahodha wa timu Mohamed Hussein ‘Zimbwe Jr’ amesema utakuwa mchezo mgumu lakini wapo tayari kufauata maelekezo kutoka kwa walimu wao.

Zimbwe Jr ameongeza kuwa wanajua mashabiki hawajafurahishwa na matokeo ya mchezo uliopita lakini kesho watajitajidi kuwapa furaha.

“Sisi kama wachezaji tupo tayari kufauata maelekezo tutakayopewa na makocha, na kila atayepata nafasi atahakikisha anapambana ili kuwapa furaha Wanasimba,” amesema Zimbwe Jr.